Humarsúpa

Posted on by
Reply

Ein af þessum klassísku spurningum sem að maður fær reglulega er hvernig gerir maður humarsúpu. Það er ekkert hlaupið að því að laga góða humarsúpu. Aðalmálið er að laga gott soð. Svo er að þykkja soðið, setja út í það vel af rjóma og smakka súpuna til.

Humarsúpan mín er blanda af nokkrum súpum sem að mér hefur verið kennt að laga í gegnum árin en það eru til óteljandi mismunandi týpur af humarsúpu og oft á hver veitingastaður sína sér týpu af súpunni.

Humarsoð

2- 3 kg humarskel (eða ca 2 fullar ofnskúffur)

1 msk paprikuduft

1 stk sellerírót

2 stk stórar gulrætur

1 stk blaðlaukur

5 hvítlauksrif

2 msk tómatpurré

3 lárviðarlauf

15 hvít piparkorn

Olía til steikingar

½ hvítvínsflaska (Má sleppa)

Setjið humarskelina og bökunarplötu og dreifið paprikuduftinu jafnt yfir. Setjið inn í 180 gráðu heitan ofn í ca 20 mín eða þar til paprikuduftið er farið að brúnast. Á meðan skelin er inni í ofninum skrælið þið og skerið grænmetið í grófa bita. Setjið upp stærsta pott heimilisins helst 8-10 litra kvikindi. Setjið olíu í pottinn  og byrjið að léttsteikja grænmetið.

Þegar skelin er orðin brúnuð bætið þið henni út í pottinn með grænmetinu, kryddunum og tómatpúrrunni. Gott er að hella ½ flösku af hvítvíni með í pottinn og láta hana sjóða niður um helming áður en þið hellið vatninu út í en það má líka sleppa því.

Hellið ca 4-6 litrum af vatni út pottinn og látið suðuna koma rólega upp, látið soðið sjóða í 1 klukkutíma við væga suðu. Setjið lok á pottinn og látið soðið standa á köldum stað yfir nótt t.d úti á svölum. Það er líka hægt að sigta soðið strax og laga súpuna svo en soðið verður bragðmeira með því að standa yfir nótt.

Humarsúpa

Humarsoð ca 3 litrar

200 gr smjör

400 gr hveiti

1 liter af rjóma

¼ flaska af hvítvíni

Cognac eftir smekk

Fínt salt

Hvítur pipar úr kvörn

Sigtið soðið og sjóðið upp á því. Bræðið smjörið og setjið hveitið út í það og blandið vel saman, þá hafið þið þessa fínu smjörbollu.

Bætið smjörbollunni smám saman út í soðið og pískið vel á meðan. Hafa skal í hug að það þarf ekki að nota alla smjörbolluna heldur á að þykkja súpuna þar til hún er eins þykk og þú vilt hafa hana. Þegar súpan er ca passlega þykk er rjómanum bætt út í og hann pískaður vel saman við, látið rjómann sjóða varlega í súpunni í ca 10 min og hellið svo hvítvíninu út í.  Smakka svo súpuna til með saltinu, piparnum og cognacinu ef að ykkur finnst vanta smá kraft í súpuna þá er í lagi að setja smá humarkraft eða örlítið af blautum kjúklingakrafti.

Best er að bera súpuna fram með smjörsteiktum humri. Sumir vilja líka hafa rjómatopp en ég vil frekar setja meiri rjóma í súpuna og sleppa toppnum.

Þetta er snilldar forréttur og getur líka verið aðalréttur með vel af nýbökuðu brauði því að súpan er mjög mettandi

-Eyþór

Páskalambið

Posted on by
1


Lambalæri er eitthvað sem að flestir Íslendingar elska og er gjarnan borðað á páskunum. Þetta læri þarf nokkra daga í undirbúningi. Þannig að það er um að gera að henda sér út í búð og ná sér í ferskt eða frosið lambalæri og skella sér í marineringar gírinn.

Marinering

AB mjólkur- og kryddmarinerað lambalæri

1 stk lambalæri

4 stk hvítlauksgeirar

2 msk fennel fræ

2 msk kóriander fræ

2 msk Cummin fræ (Ekki Kúmen!!)

1 tsk chili duft

2 msk reykt paprika

2 msk maldonsalt

½ líter Ab mjólk

Skerið hvítlauksgeirana í tvennt og stingið nokkur göt á lærið með jöfnu millibili og setjið hvítlaukin í þau. Ristið kryddin á þurri pönnu eða í potti, byrjið á heilu fræjunum – hálf ristið þau og bætið svo duftinu út í. Blandið kryddunum ásamt saltinu út í ab mjólkina og smyrjið svo lærið vel upp úr því.

Setjið lærið inn á kæli og látið standa í minnst 2 sólahringa – mest í 4. Gott er að setja það á bökunargrind með plötu undir svo að lærið liggi ekki í vökvanum.

Eldunin á lærinu er svo þægileg – setjið lærið í ofnskúffu í 160 gráðu heitan ofninn í 2 ½ tíma takið lærið út og kryddið með maldonsalti ef að þurfa þykir .

Með þessu er hægt að hafa alls konar mismunandi meðlæti en ég mæli alla vega með því að þið hafið jógúrtdressingu.

Jógúrt dressing

2 dollur af hreinni jógúrt

1 stk agúrka

1 stk lime

2 msk fínt rifið engifer

½ hvítlauksgeiri fínt rifinn

Maldonsalt

Rífið gúrkuna með grófu rifjarni,

rifið börkinn af lime-inu yfir gúrkuna með microplane járni. Bætið engiferinu og hvítlauknum út ásamt jógúrtinni og kristið í lokinn safann úr liminu. Blandið öllu saman og smakkið til með maldonsalti.

Þette er algjör snilldardressing sem er góð með fiski og kjöti. Og er gríðarlega fljótleg í lögun.

Annað sem að ég bauð upp á með lærinu voru ofnbakaðir sætkartöflubátar með smá maple sýrópi, ferskir tómatar sem að mamma kom með að norðan frá Hveravöllum, en þau gera sennilega eina af bestu tómötum landsins. Melónu- og lárperusalat, gamla góða soðna spergilkálið og naan brauð.

Þetta var stórgóð máltið og dugði lærið og meðlætið fyrir 6 fullorðna og 1 lítinn stubb. Maður hefði átt að gera naanbrauðið sjálfur á útigrillinu en það vannst ekki tími til þess í þetta skiptið.

-Eyþór

Blautt og Sveitt Ostaköku-Brownie að hætti Katrínar Sys

Posted on by
Reply

Nú eru páskarnir á næsta leyti og það er sjaldgæft að maðu heyri að fólk ætli í átak eftir páskaátið.  Kannski vegna þess við erum ekki með eins fastmótaða siði með páskamatinn, nema náttúrulega með lambið og jú páskaeggið.  Þessi uppskrift sameinaðar tvær af mínum uppaháldskökum, New York ostaköku og súkkulaði brownie.

Nema hvað ég þarf alltaf að bæta extra karamellu í allt sem ég geri þessa dagana og smá auka pistasíur, en það er bara svo að ég geti kallað hana sveitta.  Þessi er farinn að vera staðalbúnaður í nestiskörfunni fyrir Þjóðahátiðana í Eyjum hjá fjölskyldunni og má ég þakka systur minni Katrínu fyrir að kynna mér fyrir henni.  Katrín lilla sys hefur síðustu ár verið að læra til flugs en verið nettur laumubakari í frítíma sínum og veldur mér aldrei vonbrigðum með.  Vonandi að við sjáum hana stíga út úr skápnum og taka við sinni sönnu köllun í lífinu.

Blaut og Sveitt Ostaköku-Brownie að hætti Katrínu

100 gr smjör
120 gr dökkt súkkulaði, saxað
120 gr sykur
2 stk egg
80 gr hveiti
1 msk kakó
1/4 tsk salt
1 tsk vanilludropar
100 gr dökkt og/eða mjólkursúkkulaði, saxað í grófa bita

Ostakökumix

200 gr rjómaostur við stofuhita
1 stk eggjarauða
80 gr sykur
1/2 tsk vanilludropar

100 gr dulce de leche

100 gr pistasíur, saxaðar gróft

Sníðið smjörpappírsörk svo hún passi í skúffuform ( ég nota 20cmx25cm form) og forhitið ofninn í 180c.

Setjið smjör og 120 gr af súkkulaði í pott og bræðið við mjög lágan hita, hrærið á meðan þar til blandan er orðin skínandi og slétt.

Takið af hitanum og blandið 120 gr af sykrinum við, ásamt eggjunum, einu í einu.  Bætið við hveitinu, kakóinu, saltinu, vanilludropnum og

súkkulaðibitunm og blandið vel saman.

Hellið í formið og sléttið úr með spaða.

Þeyttið saman rjómaost, eggjarauðu, sykur og vanilludropa þar til mjúkt og vel blandað saman.

Doppið rjómaostablöndunni hér og þar yfir súkkulaðideigið og rótið aðeins til með skeið, passið bara að blanda ekki of vel saman við súkkulaðideigið.

Stráið pistasíunum yfir og bakið í ca 30-40 mín.

Passið bara ekki að ofbaka deigið, það er allt í lagi að það sé pínu blaut enþá, þegar pinna er stungið í gegnum það eftir þennan tíma.

Meðan kakan er en volg hellið dulce de leche yfir og leyfið að kólna.

Berið fram með þeyttum rjóma eða ís, annars finnst mér hún best ein og sér á sunnudegi í Eyjum með mjólkurglasi.

-Kjartan

Food and Fun á Kolabrautinni

Posted on by
Reply

Á sunnudaginn síðasta fórum ég og Silla í góðum félasskap á Kolabrautina að borða food and fun matseðilinn sem að Jennifer Jasinski hafði sett saman með Kolabrautarmönnum.

Jennifer er eigandi 3 veitingastaða í Denver, en einn af þeim Rioja sem hefur verið valinn besti veitingastaðurinn í Denver nokkrum sinnum. Fyrir þá sem vilja fræðast meira um þennan veitingastað er þetta slóðin http://riojadenver.com/

Á undan matseðlinum fengum við  smakk sem að samanstóð af Íslenskri Hörpuskel og reyktri þorskbrandöðu og trufflu-aioli.

En fyrsti réturinn á matseðlinum var salat:

Blóðappelsína, grillaðir trompet-sveppir, lárpera og geitaostur með belgísku jólasalati, vætukarsa og appelsínu-vinagrette. 

Annar réttur var fiskur en það var :

Snöggsteiktur lax með bláskel úr Breiðafirði í saffranseyði, ólífuperlupasta í olíu, tómathlaup, snöggsoðnir ætiþistlar og romanesco-káli.

Fyrst kom laxinn og meðlætið og svo var saffranseyðinu hellt yfir

Aðalréturinn var:

Grillaðar lundir og innbakað lambabuff með karmellaðri fenniku, kúskúskoddum, reyktu tómatkremi, Meyer-sítrónujógúrti, hjartafró.

Hægsoðnar Comice-perur með kastaníu-ganache,marengs með fennelfræjum,hægsoðnum rauðum vínberjum og rauðvínsgljáa.

Ég myndi mæla með því að fólk sem ætlar til Denver á næstunni að kynna sér þennan stað, því maturinn sem var boðið upp á Kolabrautinni var algjörlega til fyrimyndar, enda ekki við öðru að búast.

Mig langar að þakka fyrir gríðrlega skemmtileg kvöldstund og mjög góðan mat.

-Eyþór

Sæt Kartöflukaramellukrömbla

Posted on by
Reply

Ok ég verð að viðurkenna eitt, ég er hundleiður á sætum kartöflum.  Mér finnst þetta eitt ofnotaðasta hráefni í matreiðslumenningu Íslendinga síðara ára.  Ég hef ekki tölu á þeim lítrum af kartöflumauki sem ég hef lagað úr þessum vinsælu kartöflum, eða grillað og bakað.  En leiðinlegra þykir mér pörunin við kjúklingbringu, það er það allra þreyttasta sem mér er boðið upp á.

Ok hættur að röfla. Ég hef þó nýlega verið að taka þetta appelsínugula jarðepli í sátt með því að kynna því fyrir heim desserta.  Það eru ekki til margar kökur þar sem grænmeti spillar stóra rullu, fyrir utan náttúrulega gulrótarkökuna.  Sæta kartaflan ætti því ekki að koma á óvart sem bragðefni.  Hún er náttúrlega sæt, liturinn er fallegur og eftir að hafa verið bökuð og maukuð, gefur hún raka og góða fyllingu.  Fyrir utan það er hún sneisafull af næringarefnum og vítamínum.

Sæt Kartöflukaramellukrömbla

200 gr smjör

200 gr hrásykur

200 gr hveiti

200 gr Möndlur, hakkaðar

1 stór sæt kartafla

1 stk lime, börkur raspaður af og safinn kreistur úr

Smá salt

4 msk Dulce de Leche (sjá uppskrift hér)

Stillið ofnin á 180c og setjið kartöfluna í á bakka inn í ofn og bakið þar til meyr í gegn (ca 40-60 mín, fer eftir stærð).  Þegar kartaflan er bökuð í gegn, látið hana þá standa út á borði þar til hún hefur kólnað og fjarlægið hýðið.

Maukið með gaffli í skál og kryddið með smá salti (á eftir munum við bæta karamellusósu við hana, svo við notum saltið til að drag fram bragðið í kartöflunni og fá smá jafnvægi á móti sætunni), bætið við lime berkinum og safanum og kælið.  Skerið smjörið í teninga og blandið saman við sykurinn, hveitið og möndlumjölið, þið getið notað hrærivél með spaða eða bara nuddað þetta saman í höndunum.

Blandan á að blandast öll saman og vera kurluð.  Kælið í amk 30 mín.  Sníðið bökunarpappír fyrir hringlaga form og komið honum fyrir.  Fyllið botninn með 1/2 af deiginu og þrýstið niður létt og forbakið í ofninum í 15 mín.

Takið út og leyfið aðeins að kólna.  Smyrjið kartöflunni yfir botninn og dreifið karamelllunni yfir.  Stráið restinni af deiginu yfir og bakið í 15-20 mín eða þar gyllinbrúnt.

Berið fram með þeyttum rjóma, ís og steiktum kjúkling ;)

-Kjartan